МУИС-ИЙН ПРОФЕССОР Н.НАНСАЛМАА ОЮУТНУУДАД “БИО КОМПЬЮТЕРИЙН ТОХИРГОО” СЭДВЭЭР СОНИРХОЛТОЙ ЛЕКЦ УНШИНА

Огноо: 2019-11-042019-11-05

Нямжавын Нансалмаа нь 1977-1983 онд ОХУ-ын Эрхүү, Свердловск хотуудад суралцаж 1983 онд Уралын их сургуулийг “Орос хэл, утга зохиолын багш, хэл бичиг судлаач” мэргэжлээр төгссөн. 1983 оноос МУИС-д тасралтгүй 35 жил багш, тэнхимийн эрхлэгч, Орхон аймгийн салбар сургуулийн Сургалт-Эрдэм шинжилгээ эрхэлсэн дэд захирал, Захирлын үүрэг гүйцэтгэгчээр ажиллаж ирсэн. 2000 оноос МУИС-ийн профессорын албан тушаалд ажиллаж байна. 1997 онд “Орос, монгол хэлний амьтны нэрийн хүншүүлсэн утгыг утгазүй, тользүйн хүрээнд судлах нь” сэдвээр ШУА-ийн Хэл зохиолын хүрээлэнд Хэл бичгийн ухааны дэд докторын зэрэг амжилттай хамгаалсан. МУИС-ийн Эрдмийн зөвлөлийн 2004 оны 02 дугаар сарын 17-ны өдрийн 03 тоот тогтоолоор “Дэд профессор”, 2012 оны 01 сарын 20-ны өдрийн 03 тоот тогтоолоор “Профессор” цол хүртсэн. Профессор Н. Нансалмаа нь эрдэм шинжилгээний 242 бүтээл туурвисан. Үүнээс нэг сэдэвт зохиол, их дээд сургуулийн сургалтад зориулсан сурах бичиг 16-г бүтээсний 10-ыг бие дааж зохиосон нь өнөөдөр их сургуулийн бүх шатны сургалтын хэрэглэгдэхүүн болжээ. Эдгээрээс хэлшинжлэлийн салбарын бакалавр, магистр, докторын түвшний сургалтанд зориулсан “Үгийн сан судлал” (2005, 2013), “Хэл шинжлэлийн судалгааны аргазүй” (2011, 2014), “Ерөнхий хэл шинжлэл” (2012), “Танихуйн хэл шинжлэл” (2014), “Нийгэм хэл шинжлэл” (2018) номууд орчин цагийн хэлний онолын шинэ хандлагыг тусгаснаас гадна “Хэл шинжлэлийн судалгааны аргазүй”, “Танихуй хэл шинжлэл” ном нь Монгол улсад энэ салбарт анхны бүтээл болсон билээ. Дээрх ном, сурах бичгүүд хэлний мэргэжилтэн бэлтгэдэг их дээд сургуулиудын оюутан, магистрант, докторантуудын заавал үзэх ном болсон ба профессор Н.Нансалмаагийн хэлшинжлэлийн салбарт туурвисан 4 бүтээлийн зохиогчийн эрхийг Оюуны өмчийн газар баталгаажуулсан байна. Эрдэм шинжилгээний 32 өгүүлэл бичиж гадаад, дотоодын мэргэжлийн сэтгүүлд хэвлүүлж, улсын болон олон улсын эрдэм шинжилгээний хуралд нийт 40 илтгэл хэлэлцүүлжээ. Мөн түүнчлэн МУИС-ийн болон олон улсын 4 төсөлд ажиллаж, салбартаа жинтэй хувь нэмэр эрдэмтэн юм.