ЯСНЫ СИЙРЭГЖИЛТЭЭС УРЬДЧИЛАН СЭРГИЙЛЦГЭЭЕ

Огноо: 2019-10-21

Ясны сийрэгжилт гэдэг нь ясны жин буурч, ясны эдийн бичил бүтэц өөрчлөгдсөнөөр яс хэврэгшин хугарах эрсдэл үүсгэдэг араг ясны системийн өвчин юм. Ясны эд эсийн бөх бат байдлыг хадгалахад гол үүрэг гүйцэтгэдэг элемент нь кальц болон Д амин дэм юм.Хүний бие махбодийн кальцын 99 % нь ясанд, 1 % нь эсийн гадна шингэн ба зөөлөн эдэд байдаг. Хүний хоногийн кальцын хэрэгцээ 1000- 1500 мг, Д амин дэм 800-1000IU байдаг. Ясны сийрэгжилт өвчин нь зүрх судасны өвчин, хорт хавдар, чихрийн шижин өвчний дараа 4-р байранд орж ирж эмч мэргэжилтнүүдийн санааг зовоож байгаа 21-р зууны чимээгүй тахал юм.Дэлхийн олон улс оронд ясны сийрэгжилт өвчин залуужих хандлагатай байна.

Ясны сийрэгжилт нь дотоод ба гадаад хүчин зүйлсээс болж үүсдэг.

Дотоод хүчин зүйлс:

Удамшил
Биеийн жингийн индекс бага байх
Өсвөр нас
Цэвэршилтийн үед / эстроген, тестостерон/
Жирэмсэн болон хөхүүл үе
Дотор эрхтний эмгэгүүд

Гадаад хүчин зүйлс:

Хоол хүнсээрээ хангалттай хэмжээний кальц авч чадахгүй байх
Хөдөлгөөн бага байх эсвэл хэт их биейин хүчний ажил хийх
Хийжүүлсэн ундаа ,кофе, архи тамхи хэтрүүлэн хэрэглэх
Мансууруулах бодист донтох
Зарим эмийн бодисууд г.м

Шинж тэмдэг:

Яс, үе мөч, нуруугаар янгинаж өвдөх, шөрмөс татах
Нуруу суулт өгч намхан болох
Ялимгүй зүйлд яс амархан хугарах, цуурах
Шүд хорхойтох, унах, буйл үрэвсэж цус гарах, шүд халуун хүйтэнд мэдрэг болох
Үс унах, хумс хугарамтгай болох, арьс хуурайших

Ясны сийрэгжилт байгаа эсэхийг рентген, денситометрийн аппаратаар болон цусны кальц, фосфат, витамин Д, бамбайн дэргэдэх булчирхайн гормоны шинжилгээнүүдээр оношилно.

Урьдчилан сэргийлэх арга замууд:

Кальц, витамин Д-ээр баялаг хоол хүнс хэрэглэх
Өдөр тутамд 20- 30 минут идэвхитэй дасгал хөдөлгөөн хийх, агаар салхинд гарах
Хорт зуршил архи, тамхинаас татгалзах
Хийжүүлсэн ундаа, кофег зохистой хэмжээгээр хэрэглэх
Эрүүл мэндийн урьдчилан сэргийлэх үзлэгт тогтмол орж байх

Та бүхэнд эрүүл энхийг хүсье.

Хангамж, үйлчилгээний газрын хүн эмнэлгийн салбар

Оюутан төгсөгчийн хэлтэс