МУИС-ийн оюутан залуус ургац хураалтын аянд амжилттай оролцож байна.
Огноо:Монгол Улсын Засгийн газар, Монголын Залуучуудын холбоо-Залуучуудын хөдөлмөрийн төв бирж хамтран хэрэгжүүлж буй “YES АЛТАН НАМАР” ургац хураалтын аянд МУИС-ийн 48 оюутан Сэлэнгэ аймгийн Орхон сумын Бэлэндалай багт хүнсний ногооны 3 талбайд хувиарлагдан амжилттай ажиллаж байна. Ургац хураалтын ажил 2021 оны 9 дүгээр сарын 22-ны өдрөөс 10 дугаар сарын 6-ны өдрүүдэд үргэлжлэх юм. МУИС-ийн оюутнууд төмс, манжин, лууван, сонгино зэрэг хүнсний ногоо савлах, хураах ажлыг гүйцэтгэн ажиллаж байна.
МУИС-ийн Утга зохиол судлалын 4-р түвшний суралцагч Т.Баасанжавтай ажлын дундуур хэсэг ярилцсан юм. Т.Баасанжав “Намрын ажилд оролцож буй шалтгаан маань гэвэл төгсөх түвшний оюутан учраас ангийнхантайгаа хамтдаа байх цагийг өнгөрөөхийг хүссэн. Мөн ажлын амтыг өөрийн биеэр мэдрэхийг хүссэн юм. Эрдэм номд шамдахын зэрэгцээ хүнд ажил хийх, түүнийг хамтдаа хийхийн сайхныг мэдрэх нь гол зорилго маань байсан. Намрын ажилд оролцоод өөрийн биеэр мэдэрсэн зүйл нь мөнгөний үнэ цэн хийгээд амьдралын гайхалтай мөчүүд байлаа. Таатай байна. Олон сайхан нөхөдтэй болж, олон гайхалтай хөдөлмөрч хүмүүстэй танилцлаа. Энд ирсэндээ үнэхээр их баяртай байна” гэлээ.
МУИС-ийн Захиргаанаас томилогдсон ажлын хэсэг ургац хураалтын орчин, оюутнуудын нөхцөл байдалтай танилцаж ажиллалаа.
ОЮУТАН, ТӨГСӨГЧИЙН ХЭЛТЭС
