“МОНГОЛЫН БА БҮС НУТГИЙН ГЕОЛОГИЙН АСУУДЛУУД” СЭДЭВТ ОЛОН УЛСЫН ЭРДЭМ ШИНЖИЛГЭЭНИЙ II ХУРАЛ АМЖИЛТТАЙ БОЛЛОО
Огноо:МУИС-ийн Геологи, геофизикийн тэнхмээс санаачлан эхлүүлсэн “Монголын ба бүс нутгийн геологийн асуудлууд” сэдэвт Олон улсын эрдэм шинжилгээний хоёрдугаар хурлыг Геологийн Төв Лаборатори (ГТЛ), Сентерра гоулд Монголиа ХХК-тай хамтран 2016 оны 4-р сарын 21, 22-ны өдрүүдэд МУИС дээр амжилттай зохион байгууллаа.
Хурлаар Монгол орон, зэргэлдээх бүс нутгийн геологийн тогтоцыг тайлбарлахад тулгамдаж байгаа асуудал, цаашдын хандлага руу чиглэсэн судалгаа шинжилгээний шинэлэг үр дүнг танилцуулах, харилцан солилцох, хамтын ажиллагааг өргөжүүлэх хэлэлцүүлэг бүхий Монгол, Япон, БНХАУ, ОХУ, БНЧУ, Канадын эрдэмтдийн хамтран бичсэн 16 аман, 6 ханын илтгэл хэлэлцэгдэв.
Хурлын хүрээнд МУИС-ийн Эрдэм шинжилгээний бичиг цувралын Геологийн асуудлууд сэтгүүлийн №446 (14) дугаарыг эрхлэн хэвлүүлсэн ба сэтгүүлд хуралд хэлэлцэгдсэн илтгэлүүдийн хураангуйнаас гадна монгол, англи хэл дээр бичигдсэн 20 орчим бүтэн өгүүллийг оруулжээ.
Хурлыг хамтран зохион байгуулагч ГТЛ-ийн үйл ажиллагаатай танилцах аялал хурлын нэг хэсэг болсноос гадна энэ үеэр МУИС-ийн ШУС болон ГТЛ хооронд хамтын ажиллагааны санамж бичигт гарын үсэг зурлаа.
Мөн хурлыг хамтран зохион байгуулагч Сентерра Гоулд Монголиа ХХК-тай хамтран “Монгол орны Хойд Хэнтийн алтны бүс дэх Бороо-Зуунмодны алтны хүдрийн дүүргийн геологи” сэдэвт хээрийн сургалтыг зохион байгуулж, алтны хүдрийн дүүргийн геологи-структурын онцлог, Бороогийн ордын нуруулдан уусгах технологи, Гацууртын алтны үндсэн ордтой газар дээр нь танилцав. Хээрийн сургалтанд оролцогчдод ордуудын геологийн тогтоц, хүдэржилтийн талаарх судалгааны мэдээлэл, гарын авлагыг англи, монгол хэл дээр хэвлүүлэн өгсөн нь сургалтын үр өгөөжийг нэмэгдүүлж өгсөн ажил боллоо.
Хээрийн сургалтанд оролцогсод Бороо, Гацууртын алтны үндсэн орд дээр
Хурлын үйл ажиллагааг ивээн тэтгэсэн Монголын Үйлдвэрлэлийн Геологийн Холбоо, Дорнод Монголын Хайгуулчдын Холбоо, Монголын Геологийн Эмэгтэйчүүдийн Холбоо, Эй Эйч Жи металс групп, Арвин цайдам ХХК, Арева Монгол ХХК, Магнетик сөүрвэй ХХК, Хүннү коул ХХК, Танан импекс ХХК, Судалт мана ХХК, Сапфир гео ХХК, Эс Жи Ай Эс ХХК, Микросейсм ХХК-ийн хамт олонд талархал илэрхийлье.
Дараагийн хурал 2018 оны 4-р сард Улаанбаатар хотод зохион байгуулагдана.
