“Өглөөний марафон 3” тэмцээний нээлт боллоо.

Монгол Улсын Их Сургуулийн “Оюутны хөгжлийн төв” болон “NUM VOLUNTEER” клубээс хамтран зохион байгуулж буй “Өглөөний марафон 3” тэмцээний нээлт 2023 оны дөрөвдүгээр сарын 9-ний өдөр боллоо. "Өглөөний марафон 3" тэмцээн нь 21 хоногийн турш үргэлжлэх бөгөөд оюутнуудад амьдралын зөв хэв маягийг дадал болгож, үр бүтээмжийг дээшлүүлэх, танилын хүрээгээ тэлж бусдаасаа суралцах боломжийг олгох, оюутнуудын багаар ажиллах чадварыг дээшлүүлэх зорилготой юм.

Нээлтийн үйл ажиллагаанд МУИС-ийн Оюутны хөгжил эрхэлсэн захирал Г.Галбаяр, Оюутан хөгжлийн бодлогын газрын дарга В.Дашдаваа нар оролцож, үг хэллээ.

Нээлтийн үеэр өмнөх “Өглөөний марафон 2” тэмцээний шилдэг оролцогч Ц.Мягмарсаран өөрийн амьдралд нь гарсан эерэг өөрчлөлтийн талаар туршлагаа хуваалцаж энэ жилийн оролцогчдод зөвлөгөө өглөө. Мөн түүнчлэн МУИС-ийн ШУС-ийн БУС-ийн Биологийн тэнхимийн ахлах багш Г.Оюундэлгэр “Эрүүл зөв хооллолт”-ын тухай шинжлэх ухааны үндэслэлтэй сургалт орж, олон шинэ содон мэдээллийг нийт оролцогч оюутнуудад хүргэлээ.

ОЮУТАН ХӨГЖЛИЙН ТӨВ

NUM VOLUNTEER CLUB