Зочин профессор Нийл Дачак, “Гэрэлт цох” ТББ-ын тэргүүн Б.Оюунтөгс нарыг хүлээн авч уулзав
Огноо:Жил бүрийн 12 дугаар сарын 03-ны өдөр “Хөгжлийн бэрхшээлтэй хүний эрхийг хамгаалах олон улсын өдөр”-ийг тэмдэглэн өнгөрүүлдэг. МУИС-д элсэн суралцаж буй хөгжлийн бэрхшээлтэй суралцагчид бакалаврын болон ахисан түвшинд амжилттай суралцахад шаардлагатай орчин нөхцөлийг үе шаттай сайжруулах, сургуулийн бүхий л нийгмийн харилцаанд тэдний оролцоог нэмэгдүүлэх, МУИС-ийн нийт багш, ажилтан, суралцагчдад эерэг ойлголт, хандлагыг төлөвшүүлэх зорилго бүхий “Эерэг ойлголт, хандлагыг төлөвшүүлье” үйл ажиллагааг Оюутан, төгсөгчийн хэлтэс зохион байгуулж ажиллалаа.
Уг үйл ажиллагааны хүрээнд АНУ-ын Кэнэса Их сургуулийн тэгш хамруулах сургалт ба бие хүний хөгжлийн сургуулийн гүйцэтгэх захирал, профессор Нийл Дачакийг урьж төрийн болон төрийн бус байгууллагуудтай хамтран олон төрлийн хэлэлцүүлэг, сургалт, нөлөөллийн ажлыг зохион байгуулж, харилцан туршлага солилцсон юм.
МУИС-ийн захирлын үүрэг гүйцэтгэгч Д.Бадарч зочин профессор Нийл Дачак, “Гэрэлт цох” ТББ-ын тэргүүн Б.Оюунтөгс нарыг хүлээн авч уулзлаа. Уулзалтаар 14 хоногийн хугацаанд үргэлжилсэн нөлөөллийн ажлын үр дүн, цаашдын зорилтын талаар ярилцаж, харилцан санал солилцов. Уулзалтад МУИС-ийн Шинжлэх ухааны сургуулийн Хүмүүнлэгийн ухааны салбарын Ази судлалын тэнхимийн дэд профессор Д.Бадмаанямбуу, Оюутан, төгсөгчийн хэлтсийн дарга М.Эрдэнэчимэг нар оролцлоо.
ОЮУТАН, ТӨГСӨГЧИЙН ХЭЛТЭС
